La Cubba

La Cubba è nu palazzu di Palermu costruitu 'n èbbica nurmanna sutta lu cuvernu di Gugghiermu II ntô 1180. Faciva parti di nu parcu chinu di viggitazzioni e lachi artificiali, chi ci dava n'aria di paradisu. Cèlibbri già 'n èbbica mediuevali ô puntu chi ntô Decamiruni di Boccacciu n'episodiu è ambientatu appuntu ntâ Cubba, lu palazzu pi la sò forma curiusamenti cùbbica, e pi li sò particulari comu li Muqarnas chi sunnu ancora òi visìbbili, fu cunzidiratu pi loncu tempu d'èbbica àrabba, nzinu a quannu Micheli Amari arriniscìu a decifrari li caràttiri àrabbi unni fiurava la sò data di costruzzioni.

Lu palazzu, chi nzinu a mità dû vintèsimu sèculu fu usatu comu caserma e pirciò nun visitàbbili, è òi visitàbbili dî turisti, e si prisenta nti nu statu precariu. Lu tettu manca e dintra lu palazzu crìsciunu erbi e àrburi. Li ristàuri privisti già di na dicina d'anni nun pòttinu accuminzari pi mancanza di sòrdi.